بلا سياسة: يلي استحوا ماتوا…

موقع إنباء الإخباري ـ
حسن ديب:

هيي الدني راكبة هيك، إنو يلي استحوا ماتوا، ويلي ما بيستحوا بعدن عايشين، لا ومش بس عايشين, عايشين وعاملين فيها ناس بتفهم وقاعدين عالكراسي وعاملين حكام عالعرب.
ايه قصدي عنن هني ما غيرن، هيدول يلي مسميين حالن حكام عرب وكل ما زهقوا بيعملوا لمة وبيسموها قمة عربية حتى يشوفوا مين أشطر من التاني بالجعدنة، إنو هيدول مثلاً شو عم يعملوا بشهر رمضان، شو وضعن قدام فلسطين، شو شعورن إذا كان بالأساس عندن شعور؟؟؟
يعني لو حيطان، إيه حيطان، كانو تحركوا عقصة فلسطين، بس ما هيي المشكلة إنك بتجي لتحكي الواحد منن عن فلسطين بيقلك هيدي حد أيا بير نفط بتجي، صراحة ما عم أعرف سبب هالتمسحة يلي متمسحينها شو هيي، يعني صحيح هني من الأول الجماعة دايرينها لا شرف ولا نخوة ولا كرامة بس هلأد كتير، ولو يا رجل، إنو اليهودي بحد ذاتو استنكر، إيه استنكر، طيب صحيح إنو استنكارو تحضير لجريمة جديدة بس عالقليلة استنكر، طيب بس إنتو يا كلاب النفط، يعني لا فهم ولا شرف ولا استنكار، انو لشو عيشتكن، ولك لشو أصلاً موجودين بيناتنا، هلأ أوقات بحس إنو لازم بهدلكن، بس برجع بقول شو قيمة البهدلة، ما هو يلي باع القدس وباع الأرض والدين شو رح ينفع معو الحكي، إنتو ناس تمسحتو عالإخر وصار وجودكن بين البشر عار عالبشرية كلها، ومنيح إنو فلسطين انتبهت للوضع وعرفت انو ما في منكم رجا وتبرأت من عروبتكم المزيفة، ليش هو في كذبة أكبر من كذبة العروبة، ولك هيدي العروبة صار حقها فرنكين بسوق الكرامة، صار حقها فرنكين لما فلسطين بدا تندبح الف مرة بالنهار والعروبة رايحة جايي من خمارة لخمارة، إيه من خمارة لخمارة، ولك إنتو عروبكتم عبارة عن بيت دعارة كبير وحضراتكم يا كلاب النفط عم تسرحوا وتمرحوا فيه، والمصيبة ومتل كل مرة إنو الشعوب نايمة وفايتة بغيبوبة وما بدها تفيق، وإذا فاقت شي مرة بتفيق بس لتخبط كم شعار وبترجع تنام، وما عم يفهم هالشعب إنو الشعارات ما بترجع أرض محتلة، ولا بتنقذ جريح أو بتفك قيد أسير، يا رجل الشعارات ببلادنا بتنباع بالكيلو إيه بالكيلو وسعرها بسعر شرف أكبر حاكم عربي.
ما هو كلو كوم وإنو هيدول الحكام مصدقين خبرية إنو هني أصحاب تاريخ نضالي كوم تاني.وهيدي يلي ما عم إقدر أعرفها ولا لاقيها قصة تاريخن النضالي، ما بتشوف إلا ألقاب نازلة عليهن من السما، وكلها ألقاب إلها وزنها، ودور فتش بتلاقي التخين فيهن مش حامل نقيفة بحياتو، بس إنو يلا هيدي الدني، هلأ رغم كل السيئات تبعن بس إنو فيهن شغلة وحدة إيجابية آنو الجماعة بتحسن مش موجودين، إيه مش موجودين، من أيا ناحية يعني، إنو من ناحية وجودن وعدم وجودن متل بعضو، إيه هيدي شغلة إيجابية، يعني بأي وقت بدو يجي حدن يهتّك بأي حاكم عربي فيك دغري تطلع من الموضوع وتقلو ما شايفو، إيه ما شايفو، ورح ضل ما شايفو لإنو نظري مفوكس عفلسطين بس، وهودي الناس ما بيوم رح نشوفن بفلسطين، بنشوف فارس عودة ومحمد الدرة، بنشوف إيمان حاجو ومحمد أبو خضير، بنشوف كل شهيد استشهد لتبقى الأرض إلنا وكل جريح انصاب لتبقى فلسطين موجودة، وبنشوف كل أسير صامد بالسجون كرمال راسنا يضل مرفوع، هودي كلن بنشوفن وبنقدسن، بس حكام العرب كلاب النفط أكيد ما شايفينن ولا شايلينن من مطرحن، هيك نحن، هيك مفهومنا للوضع، وما رح زيد أكتر من هيك مش كرمال شي كرمال إنو الدني صيام، وبالصيام لازم الواحد يضبط أعصابو قدر المستطاع ويبعد عن السياسة أد ما في لإنو شهر رمضان شهر مبارك، وحلو يكون مبارك بش بلا سياسة…