بلا سياسة: يا شعب لبنان الشقيق

موقع إنباء الإخباري ـ
حسن ديب:
لفتني مبارح الفيديو المنتشر على مواقع التواصل الإجتماعي ويلي بيقول فيه الملك عبدالله بن عبد العزيز المرخاني ( الشعب السعودي الشقيق )، للصراحة مش العبارة هيي يلي لفتتني بالعكس، يلي لفتني هو نسبة التهكم الهائلة من اللبنانيين على هالفيديو، وكمان للصراحة أنا إنسان تهكمي وصاحب نظرة ساخرة زيادة عن اللزوم بس بهيدي النقطة بالذات كنت واقف بمطرح تاني وعم شوف القصة من منظار مختلف، إنو عشو التهكم وليش مستغربين هالعبارة، الزلمة صريح وواضح وعم يحكي يلي بقلبو.
بس المصيبة إنو الشعب اللبناني ما بيحب الصراحة، يا خيي بالعكس أنا شايف إنو إبن مرخان كان عم يحكي الحقيقة، الزلمة عارف أصلو وفصلو وعارف إنو ما عندو أي إرتباط بسكان الجزيرة العربية وإنو جايي من نسل مرخاني قح ولهيك كان واضح مع الشعب وخاطبن بالشعب السعودي الشقيق، لإن الزلمة ما بدو يكذب بآخر عمرو هيدا إذا بعد عندو عمر.
بس نحن شعب ما بنحب الصراحة، لإنو تعودنا على الكذب، وصار الكذب بيمشي بدمنا، يعني بتخايل إنو إذا شي سياسي لبناني راح يعمل فحص دم رح تطلع فئة دمو (كذبوزيتيف، أو كذنيغتيف) لهيك صار المواطن اللبناني غير مؤهل لتقبل الحقيقة خاصة الحقيقة لأجل لبنان هيدي يلي بتتغير حسب الطقس (مين قال إني قاصد المحكمة الدولية)، ما ناقصنا مشاكل مع حدا بليز…
حاصلو… إنو إنتَ يا لبناني يا فينيقي يا تؤام الأبجدية، نازل طخ ع إبن مرخان وما منتبه عوضعك، إيه عم إحكيك الصراحة إنتَ ما منتبه عوضعك، وما منتبه إنو تلات رباع دولتك اللبنانية هي مش لبنانية، يعني بدك تقنعني إنو في رئيس بالدني معو جنسية غير جنسية بلدو (ويمكن تكون مزورة)؟؟؟
إنو كيف هيدي… بعدين حبيبي تعى حتى نناقش بلبنانية لبنان يلي حضرتك شايف حالك فيها، دخلك إنت منتبه لبيضة القبان، إيه البيك ما غيرو، طيب إنت منتبه إنو البيك مش بس أصلو من السلالة الجنكيزية لا وكمان بيفاخر بجذورو إنو الزلمة مجنكز من زمان، ولا بتحب ذكرك إنو بيت الجميل يلي هني بيت رئاسي بإمتياز أصلن مصري ويا ريت وقفت عالأصل المصري، الجماعة حاولوا بفترة من الفترات العودة للأصل العبراني لما كان شارون يتغدا عندن بالبيت، بس إنو بيضلوا أحسن من غيرن من ناحية إنن جماعة معروف شو أصلن، بشرفك مش أحسن من واحد راكبة براسو يترشح للرئاسة وهو ما عارف لا أصلو ولا فصلو. ما هو لو إبن أصل كان بيستحي عحالو وبينضب ببيتو وبيلعب إكس أشرفلو.
ليس… شو بدنا في، الزلمة حاول ولا بأس من المحاولة، بس هيدا كلو بمرقو عأساس إنو أسماء العيل ممكن تحمل تشابه وتضيع الطاسة، بس الطاسة يلي ما عم تضيع معي إنو يكون في نائب من بيت دوفريج،،، العمى إنو برمت بتاريخ العيل اللبنانية تأعرف إذا هالعيلة مرتبطة بشي عيلة لبنانية بس كعيت، يا خيي عأساس في متل بلبنان بيقول كلو بيرد شمص، بس إنو شمص و دوفريج ما ركبت معي، ولك حتى خوري ودوفريج كمان ما ركبت، بس هيي كمان ما بتوقف عالعيلة خلينا نروح عإشيا تانية، مثلاً بس يكون عم يحكي عمك كارلوس، إيه إبن إده ما غيرو، جربت شي مرة تغمض عيونك وتسمعو، جربا شي مرة وشفلي وين رح تلاقي لبنان بين حروفو يلي متخانقة مع بعضا، ولي السفير الهندي بيلطش عربي أحسن منو، شو مفكر إنتَ.
ليك حبيبي، عبد الله المرخاني ما قال شي غلط لما شلخ خبرية الشعب السعودي الشقيق، بس الغلط راكب عنا لما بدن يطلعوا هودي الناس يلي خبرتك عنن ويحكوا بإسم لبنان، يا خيي شو فيها إذا قالوا الحقيقة، قلي شو فيها؟؟؟
يعني من شو بتشكي يطلع الحكيم ويقول يا شعب لبنان الشقيق، إنو الحقيقة حلوة والجماعة محتلين حدنا من ال 1948، إيه شو فيها، ومن كانت بتشكي قصة النادور(الناضور) لو أُرفقت بعبارة الجيش اللبناني الشقيق، من شو بتشكي قلي تشوف، والله الصراحة حلوة، يا خيي حلوة نعرف إنو لبنان مش بس وطن لكل ولادو، لا كمان هو وطن لولادو ولولاد الجيران كمان، وأكتر من هيك إنو من شو بيشكي نعترف بلبنان على إنو سوق خضرا ولكن واسع شوي، ما هو حتى سوق الخضرا بتلاقي في بطاطا مصرية وخس تركي وبطيخ ياباني، إيه ما هو ما بقى ناقص إلا يجيك شي سياسي من بيت ياماها ويقلك وطني لبنان، بصراحة أنا صرت محتار لبنان وطن مين، ومين يلي بدو يحكم مين وخايف شي يوم هالشعب النايم يفيق يلاقي حالوا شعب تاني، هيدي إذا فاق أصلاً لإنو مشكوك فيها القصة…
بالنهاية، لا بدّ لنا، وهيدي لا بدّ لنا شغلة كبيرة، لذلك لا بد لنا إنو نركز هالخضرا وعالزراعة المحلية، حتى تضل قصتنا أهلية بمحلية، وألف تحية من القلب لكل سياسي لبناني هو بالأصل مش لبناني، والتحية الكبيرة لشعب لبنان الشقيق يلي عايش عالسياسة ولكن ع طريقة بلا سياسة….