بلا سياسة: من شو بيشكي…

موقع إنباء الإخباري ـ
حسن ديب:
بدكن للصراحة صرلي فترة مشغول بالي على جاري، إيه هو ما غيرو يلي كان يلطيلي الصبح لحتى يتحفني بتحليلاتو السياسية المميزة، ما هو من لما قلتلو أخر مرة إنو يفوت ينضب ببيتو ما عدت سمعتلو حس، بيني وبينكن أنا قلت هالزلمة زعل مني ولا بد إني إسأل عنو وطيب خاطرو، وهيك صار دقيت عليه الباب وناولتو وحدة من خبريات كيفك يا جار، دغري قلي أهلاً أهلاً فوت جار فوت جيت بوقتك عم إسمع أخبار، قلتلو لا والله مستعجل متل العادة بس حبيت إتطمن عنك، قلي يا خيي أنا مش منيح ولا رح صير منيح طالما الفراغ وصل عالقصر الجمهوري، وهون أنا عرفت إني أكلت الضرب وعلقت بحوار سياسي كنت بالغنى عنو، حاولت إزمط بجلدي، قلتلو انشالله خير يلا اتطمنا عنك، وإذ بينفض عنو غبار الغياب ومتل العادة بيخبطني ياها: إنو جار… شو رأيك بالفراغ، هلأ بيني وبينكن أنا أصلاً ما كان إلي خلق روح عالشغل لإن العمر بيخلص والشغل ما بيخلص، لهيك مشيت معو بالخبرية، قلتلو والله يا جار منيح الفراغ إنو من شو بيشكي عالقليلة وحدو الفراغ ما بيعمل طوشة راس وبيخليك رايق.
ليش في متل الفراغ، بس المشكلة إنو نحن اللبنانية عطول بنشوف السلبيات وما بنشوف الإيجابيات.
يعني رح خبرك كيف، إنو في غير الفراغ الرئاسي حاز على موافقة كل السياسيين، طيب في غير الفراغ الرئاسي وصل مرتين ع قصر بعبدا بدون أي إعتراض من أيا حدا من السياسيين، أو شفتلي هالسياسيين اتفقوا على شغلة بحياتن أكتر من الفراغ.
بعدين يا صاحبي بس الفراغ هو يلي تارك المواطن بحالو، إيه بس الفراغ، شي مرة بحياتك سمعت إنو الفراغ سرق المال العام، أو شفت شي مرة الفراغ باع واشترى بالناس، أو واصلك شي خبر إنو الفراغ نجح بالإنتخابات من خلال اللعب بديموغرافية البلد، علماً إني متأكد إنك ما سامع بشي إسمو ديموغرافية بس أكيد بتوافقني الرأي.حاصلو، خلينا بموضوعنا، ولك يا خيي بس الفراغ هو يلي قادر يكون عالحياد باللعبة السياسية، لإنو ما رح يكون مع فريق ضد فريق، يعني شفتلك شي فراغ مثلاً اعتبر المقاومة معادلة خشبية، أو سمعتلك عن شي فراغ بارك زيارة البطريرك الراعي المشبوهة، أكيد لأ، لإنو الفراغ زلمة واعي وعندو بعد نظر مش كيف ما كان يعني، بعدين دخلك شو تغير عالناس، إيه خبرني، شو تغير، ما هو لما كان في رئيس كان السحسوح بربع وكان المواطن يلي ما إلو ضهر رقبتو مشاع للرايح والجايي، إنو شو تغير…
بيني وبينك الفراغ أحسن، عالقليلة يا خيي إنو ما رح يوجعلنا راسنا لا بتمديد ولا بكرة سلة ولا بقرية رياضية، بعدين الزلمة أعزب، يعني لا عندو إبن يسكر جامعة ولا مرتو مترأسة جمعية خيرية ولا ناوي يفتح بازار سياسي على حسابو. وأكتر من هيك كمان يا ريت عدوى الفراغ بتنتقل للمجلس النيابي، وللحكومة، إيه يا ريت، ما هيي القصة عنا ماشية عالسبحانية والفوضى والمحسوبيات هيي يلي دايرة البلد، طيب يا خيي خلي الفراغ يوصل عكل المراكز السياسية وهيك المواطن بيمشي مع هالموضة وأكتر من القرد ما مسخ ربك، وع سيرة القرد سمعتلك شي مرة إنو شي رف قرود عندن فراغ بالقيادة؟؟؟؟
ولك أكيد لأ لإن القرود ولك إيه حتى القرود متكاتفين ومتضامنين مش متل السياسيين عنا ولك يا خيي القرود جماعة بيشتغلو على المصلحة العامة ما عندن مصالح خاصة، الجماعة حدود طموحن موزة، بينما بلبنان عنا السياسيين ولك غابة موز ما بتشبعن، شو مفكر إنت، ولك حتى بالغابة كل حيوان بيعرف حدودو وين وبيعرف شو عم يعمل، انشالله مفكر إنو بالغابة بيصير متل ما عم يصير عنا؟
سمعتلك شي مرة إنو في نمر فات عبيت حدا وأكلو، لا حبيبي ما صايرة، بس إنو الناس شايفيتو مفترس لإن إذا حدا قرب عأرضو بياكلو، إيه ما نحن متعودين إنو بس حدا يفوت عأرضنا نرش عليه رز ونعملو ضيف، ولما النمر يلي عنا أكلو اعتبرنا المأكول ضحية ولك كيف ضحية وهو فايت حتى ياكلنا، شفت كيف، نحن عايشين بوطن الغابة أرحم منو بألف مرة، لإن في عنا ناس انفقدت فيهن النخوة والكرامة، والإنسان يلي بتنفقد في النخوة صدقني حتى بالغابة ما بيعود إلو مطرح…
طيب جار هالمرة أنا طولت عليك الحديث، ما تواخذنا حبينا نتطمن عنك، يلا وصينا، وإبقى خلينا نشوفك، بس متل العادة بلا سياسة …