بلا سياسة: ما تكتب بالعربي…

موقع إنباء الإخباري ـ
حسن ديب:

هيك ومن الأخر، وعيت الصبح وعبالي أعمل حملة مناهضة لحملة أكتب بالعربي، وسميها ما تكتب بالعربي، وهيدا الشي خطر ببالي لسببين، السبب الأول أنو لازم عطول يكون في حدا معارض، والسبب التاني هو اني شفت الحملة كلها متعلقة بالكتابات يلي بتصير على مواقع التواصل الإجتماعي وما شابه، يعني حملة خاصة بالعالم الإفتراضي، ومن هون بندعس اول دعسة بالطريق يلي بتودينا لنشوف اديش صار العالم الإفتراضي عالم واقعي او بشكل تاني بنشوف اديش نحن صرنا ناس افتراضيين.
وهيك كان لا بد من إنو نقول ما تكتب بالعربي، لإن يا خيي ما بتزبط تكتب بالعربي ومخك راكك عالفرنجوني، وكمان ما بتزبط تكتب بالعربي وإنت أصلاً في بينك وبين الخط العربي سوء تفاهم، أول شي يا روح أمك بدك تروح تعمل دورة خط وبعدين بدك تقرر كيف بدك تكتب، لإن في ناس كتير بتكتب بالعربي بس خطها مش واضح وإذا كان واضح بيكون خط فرنجي وأوقات كتيرة بيكون فرنجي عميل، وإذا بدنا نعطي أمثلة عهالشي ما بنخلص، ولكن ع سبيل المثال مش الحصر شوف كم موقع إخباري من تبع عمك جون كاري بيكتبو بالعربي ولكن روح الخط مساقبة معن عالعبري.
وشوف كم صحافي من جماعة المرتزقة كمان بيكتبو بالعربي ولكن عطول الهدف من كتاباتن عبري، أضف الى ذلك الأخت الفاضلة بنت المقلد يلي صفحاتها عمواقع التواصل الإجتماعي بتضج بالأحرف العربية ولكن بمفهوم عبري، ولووووو، مش حضرتها المرة الماضية وبالعربي كمان كتبت وبكت حزناً عاليهود يلي انطحنوا بالقدس…
هيدي الأمثلة مش من باب التحريض أو التهجم، لا سمح الله، بس هيدي لحتى تعرف يا مان إنو الأهم من إنك تكتب بالعربي هو إنك تفكر بالعربي، ولحتى تكتب صح لازم تفكر صح، أما إذا ما بدك تفكر فالأفضل إنك ما تكتب.
ما هو أوقات كتيرة بيكون عدم الكتابة تعبير بحد ذاتو، بعدين ما نحن شعب تعود إنو ما يعبر ف شو عدا ما بدا، ولا إنو هيي هيصة وبتمرق، إيه لا ما تواخذني ما رح مرقلك ياها، لإن يلي طوش راسنا بعشق المقاومة وبالعربي، رجع تهجم عالمقاومة بالعربي، ويلي من فترة كان يتهجم عالمقاومة بالعربي اليوم عم يدافع عنها بالعربي، يعني ما زابطة تكتب بالعربي وإنت عم تقبض بالعملة الأجنبية، يا خيي طالما عم يحكوا أد ما عم يقبضوا طيب يكتبوا بلغة العملة يلي عم يقبضوا فيها.
هيك حتى تكون الأمور واضحة ويكون كل شي على بياض، لإن الوضع صار مقرف، وأصحاب الحروف المأجورة من الميلتين صاروا أقرف.
وما بين المقرف والأقرف بعدك إنت عزيزي اللبناني كل يومين تلاتة بتطوشنا بفصاحتك وبوطنيتك، يا خيي حلوة الوطنية بس لما تكون كاملة، يعني ما فيها نقص والا بتصير وطنية ضاربة ع دعسة ناقصة، والدعسة الناقصة بتعور وبتعمل شد عضل، إيه متخايل إنت شي كلمة صايبها شد عضل، وليه بتصير كلمة عرجة وبتضرب شكل الجملة ويمكن تبعد عن ملاعب الحروف لمدة طويلة.
كرمال هيك خيي، فكر بالعربي.
لمرة وحدة كرمال يلي خلقك فكر بالعربي، يعني للمرة الألف رح قلك فييييييق، فيق وفكر صح واحكي صح واكتب صح، ولك يستر على عرضك فيق لإن ما بدنا نفكر عنك ولا شغلتنا نفكر عنك ولا هدفنا نكتب عنك…
ومن هون لحتى الله يفتحها بوجك رح ادعيلك الله يهديك ويحميك ويخليك بس بلا سياسة…