بلا سياسة: ما تفهمني صح…

موقع إنباء الإخباري ـ
حسن ديب:
غريب هاللبناني غريب، وأغرب شي في هي نظرتو للمجتمعات الباقية، وهيدي العادة عادة قديمة عمرها من عمر الأرزة ويمكن أكبر من الأرزة بشي كم يوم، مش مهم، بس المهم إنو هالعادة قديمة.
وهيدا اللبناني أباً عن جِد بعدو بيشوف إنو الإنكليزي قليل مروة والكندي عايش عالروتين والإلماني متل المكنة والصيني حياتو كلها بالشغل والأمركاني ما عندو حياة إجتماعية والأفريقي إنسان متخلف، العمى، إنو حتى بينتقد جزر القمر ( وللتاريخ بعدني لليوم ما بعرف وين بتصير جزر القمر عالخريطة )،
ما في شي معاجبو للّبناني، لدرجة إنو من وقت لتالت بتحس إنو جايي من شي كوكب تاني بس حتى يعطي رأيو بالناس، إيه من وقت لتالت، لإن من وقت لتاني ما بتحسو هيك بتكون متأكد من هالموضوع.
هلأ بلا طول سيرة، بس مش عم إفهم هاللبناني شو أساس نظرتو هيدي، وشو يلي عم يخلي يفكر إن كل المجتمعات فيها علل إلا مجتمعنا الله دخيل إسمو راضي عنو، يعني مثلاً راح عمل شي جولة حول العالم وشاف معاناة الشعب السويدي واحترق قلبو عأهل السويد، ولا مثلاً سمع عالأخبار إنو أهل كندا ما عم يقدروا يشتروا مازوت بالشتوية ونزلت دمعتو تضامناً مع الجماعة، أو لا يقوم حدا صيني عم يشكيلو همو بالسر إنو مش ملاقي شغل وولادو ميتين الجوع، أو الأمركاني ما قادر يدفع قسط المدرسة لولادو وطالب منحة من الدولة اللبنانية الكريمة…
عن جَد ما طبيعي،،،ويلي ما طبيعي أكتر لما يبلش اللبناني يطق نظريات عن الشعوب المتخلفة ودول العالم الثالث، هلأ من ناحية إنو لبنان مش من دول العالم الثالث هيدي ببصملو عليها بالعشرة، لإن أصلاً لحتى لبنان يتصنف لازم عالقليلة يكون دولة بالأول، مش كم زاورب ومحورين وتلات أربع زعران حاملين علم وعاملين دولة، هيدي معو حق فيها، نحنُ لا نقبل إنو نكون من العالم الثالث لإنو هودي جماعة متخلفين، ولا وكمان بيصر عكلمة متخلفين عأساس صاحبنا ما مخلي حي أفريقي مش لعبان فيه سبع بلاطات، يعني مش إنو حكي، لا حكي مع سبق الإصرار.
ما هو اللبناني بطبعو إنسان مُصر ع كل شي. هلأ خلينا بحديثنا، إنو هيدي نظرتو للشعوب الأفريقي على إنو هيي شعوب متخلفة منين جايبها، على أساس حضرتك ضاربة فيك الحضارة وعم تنقط من كواعك مثلاً، طيب إنو كيف شايفو متخلف للأفريقي، لإنو فقير ودولتو عم تنهبو، ليش يا شلفون ما شايف حالك كيف ميت الجوع ودولتك داعستك، ولا شايفو متخلف لإنو عندو حس العبودية، إيه اسمالله عليك شو إنك حر إنتَ، ما إنتَ أد منك حر ما إلك قلب تغير الطقم السياسي يلي بيبيعك وبيشتريك الف مرة باليوم يا بورصة عصرك، أما إذا شايفو متخلف نسبة لقصة العلم فهيدي كبيرة وكبيرة عأساس إنو الشب اللبناني بيخلص جامعتو وبيلاقي تلاتة كيلو وظايف ناطريتو عالباب.
إنو فيك تخبرني يا حفيد الفينيقيين حضرتك شو بتفرق عن الشعوب المتخلفة؟
أكيد فيه فرق بس خليها بيني وبينك الفرق لمصلحتن هني مش لمصلحتنا ورح خبرك كيف،
إنت بتعرف حبيبي إنو بأكتر الدول تخلف ممنوع واحد متل حكيمك يترشح عالرئاسة، بس إنت يا متحضر قبلت فيها وعالمعس.
إنت بتعرف إنو بالدول المتخلفة ما بيسترجوا يتمسخروا عالرئيس لأنن بيعرفوا إنو مش هني يلي جابو رئيس، بس إنت يا فهيم جبت الرئيس وزقفتلو وهلأ نازل مسخرة عليه وبكرا إذا تصالحو بين بعضن ومددولو رح ترجع تزقفلو متل ما شايفك وشايفني.
حبيبي إنتَ بتعرف إنو بالدول المتخلف ما في علّوكة؟؟؟ بتعرف إنو ما في نائب مضروب ع راسو يطلع يتفصحن عن استراتيجيات وخطط، حبيبي ما هني عارفين إنو نوابن جايين يعبوا ويفلوا ليش تيطوشوا راسن فيهن، بس تسلملي إنت يلي عندك كل نائب بينصاب بالعين من كتر الفهم، بشرفك استحي عحالك ولك حتى بالبلدان يلي إنت شايفها متخلفة ما طلع ولا نائب مبشر فيه نبي.
ولك يا تقبر حالك إنت بتعرف بدول التخلف ما حدا فاضي يسأل التاني شو دينو وشو إسمو ومنين جايي ولوين رايح، بس شفلي حضارتك وين وصلتها الطائفية والمناطقية، ولي يا فهيم عالقليلة بالبلدان المتخلفة، ما بقى في متاريس، ولا عندكن الثقافة الفستقية، ولك حتى شهال ما عندن، إنت بتتخايل إنو شو يعني يكون عندك شهال وهني محرومين من هالشغلة.
بشرفك حاول، ما بدي إجبرك بس إنو حاول تشيل هيدي الفنعة من راسك، وبلا قصة اللبناني والأرزة وهالأمور يلي أكل عليها الدهر، ما رح تخسر شي ولو خيي، إنو فيق، شو بيصير إذا بتفيق، ما شبعت نوم ولا هلأد مكسور عليك نوم يا رجل، عن جد حاول تفيق بلكي بتزبط معك المحاولة، فيق وعيش عقياسك مش عقياس غيرك، شو بدك بالعالم، لا أول ولا تاني ولا تالت رح ينفعك، ما بيحك جلدك إلا ضفرك، لهيك سماع مني وفيق، وشوف شو بدك تعمل بوضعك لإنو وضعك صعب، وأنا خايف عليك تفيق متأخر وتلاقي يافطة مكتوب عليها وطن للبيع، والوطن لما ينباع بينباع برخيص يا غالي، برخيص كتير، لإنو الأرض عرض والعرض غالي. وبتمنى عليك إنك ما تفهمني صح، أنا ما عم حرضك عالدولة لإني بطبعي ما بحب فوت بقصص السياسة والدولة ووجع الراس كلو، أنا بس عم دردش معك، يعني هيك هيك ما في شي نعملو، لا عنا دولة نشغل بالنا فيها ولا شي فقلت بندردش سوا.
عفكرة يا غالي بس لحطك بالصورة، بأفريقيا من لما تنزل من المطار كل ما تشوف مواطن بيخبطك جملة : (Nboka na ngaii)، وهيدي معناتها بالعربي : (هيدي أرضي)، انتبهت للجملة يا غالي، هو ما قاصد فيها شر ولكن عم يخبرك إنو هيدي إرضي وأد ما تقعد فيها بالنهاية رح تفل وإبقى أنا بأرضي، فيا ريت بتتعلم من هالمتخلف كيف ترتبط بأرضك أحسن ما شي يوم تفل إنتَ وتروح الأرض للغريب، وما غريب إلا الشيطان، وع سيرة الشيطان عزيزي اللبناني دير بالك عحالك وبلا سياسة …