بلا سياسة: فطحل معاليك…

موقع إنباء الإخباري ـ
حسن ديب:
الحمد لله الذي أخرج من ساستنا وزير فطحل، تجرأ إنو يتمرد عالواقع اللبناني ويفتح ملف الفساد الغذائي، ويشن حرب ضروس فداءً لصحة الوطن والمواطن.
إيه لا بد من إنو نحمد ربنا على هالنعمة الإلهية، شو مفكرين إنو القصة هينة، لا أبداً مش هينة إنو وزير لبناني يفيق من الغيبوبة السياسية ويقول خلص لازم نحمي المواطن. هلأ صحيح إنو صحوة الضمير والحس الوطني ما بتطمن لإنو ما تعودنا ع هيك شي ولكن خلينا ناخد الأمور بحسن نية بما إنو نحن شعب على نياتنا، ومن كتر ما نياتنا صافية صرلنا من أيام العصر المردكوشي عنا رضى غير طبيعي عن الإقطاع السياسي لحتى صارت القصة متوارثة من جيل لجيل، يعني فينا نقول بتمشي بالدم.
ليسَ…بلا ما نرجع للماضي، بس عن جد إنو فطحل معاليك، يعني هيك بكل حنكة وخبرة قدرت بلمح البصر تكشف كل هالفساد الغذائي، ولك حتى إنك ع شوي رح تفوت عالبيوت وتفتح البرادات وتبلش تنقيب عن الإشيا الفاسدة، بس يا ريتك بتعملها، إيه والله يا ريتك بتعملها لحتى تشوف كم عيلة ما عندا لقمة أكل بالبراد، ومش إنو ما في أكل كرمال ما يتسمموا… لا معاليك ما تفهمني غلط، في عالم ما معها تاكل بسببكن، لإنو حضرتكن ما تركتولن شي بالبلد، هيدول الناس معاليك، عم يشتهوا اللقمة حتى لو كانت فاسدة.هيدول الناس ما عندن مشكلة إنو الهوا تشيكن تكون دجاجتو فاسدو أو الحلاب تكون قشطتو قاشطة، لإنن بحياتن ما مرقوا من حد هالمحلات، هيدول الناس جاعوا بعد عز لحتى حضرتكن تشبعوا ويا ريتكن رح تعرفوا تشبعوا.
فيق معاليك فيق، فيق وشوف الناس كيف عايشة، وإذا بدك تتناحر إنت وشي سياسي متلك روحوا تناحروا عحسابكن مش ع حسابنا يعني لعبوا بعيد لإنو زهقنا لعبكن…
معليش معاليك، يعني حاجي تستهبلونا، وحاجي كل ما واحد منكن بدو يمرق شي خبرية، يعمل المسرحية المعهودة تبع قلبي عالشعب، معاليك الأفلام الهندية كلها حضرناها يعني ما بقى ولا فيلم يمرق، ف الله يرضى عليك، بلا فطحلة، هلأ إنت فطحل ما إختلفنا، بس يا ريت بتتفطحل بمجلس النواب قبل ما تتفطحل علينا.
دخلك إنت وطقمك السياسي وين كنتو لما الهوا تشيكن أكل كل مزارع الدجاج الزغيرة يلي كانت ساترة كم عيلة، ولا وقتها ما كانت دارجة قصة التمديد وكنتوا بحاجة للناس، ودخلك إنو قشطة الحلاب انضربت هاليومين بس ولا من أحا وأحين سنة كان في مانع لكشف المستور، إنو بلكي بتخبرنا إذا ما عندك مانع…
طيب معاليك، إنو نشد على أياديك نحن بهالملف الملون يلي فاتحو، بس شو بخصوص الفساد يلي متعلق مباشرةً بوزارة الصحة، يعني وزارتك، لإنو كل شي إلكن بهالبلد وما في شي للمواطن، ليش ما فتحت ملف الأدوية المخدرة يلي المفروض إنو يتم استيرادها فقط من قبل وزارة الصحة، ومع هيك عم تنباع بالشوارع وبسعر أرخص من السعر الرسمي تبعكن، وإذا ما مصدق، فيك تنزل معاليك ع حي السلم مقابل مدرسة دار العلوم ورح تشوف إنو في وزارة صحة تانية هونيك…
بس، فطحل معاليك، ما بيهمك هالموضوع لإنو أصلاً من مصلحتكن الشعب كلو يتخدر. طيب معاليك شو بخصوص حبوب الترامال، بتعرف معاليك إنو هالحبوب صارت عم تنباع بالدكاكين، يعني بتفوت عالدكانة بتقلو ريس بعد إذنك قنينة جونال وعلبة ترامال، هلأ ما بعرف ليش إجت الجونال ع راسي، بس إنو مثلاً…
بتعرف معاليك إنو أكتر شي فاسد بالبلد هو إنتو، إيه إنتو، إنتو فاسدين أكتر من كل الأصناف يلي حضرتك ذكرتها، وإذا بتفكر بضمير بتلاقي إنو كل الطقم السياسي يلي راكب عالبلد غير مطابق للمواصفات، لهيك معاليك، بلكي بتبلشوا بحالكن وصدقني لما السياسة تنضف كل البلد رح ينضف مش بس اللحوم، ما إنتوا أكلتوا لحوم الناس يا مان….
فطحل معاليك… بس أهم شي إنك ما تقرب عالمغتربات وتتدخل بقصة الغذاء، مش كرمال شي، بس إنو بيكفي هجّرتونا من بلادنا كمان بدكن تموتونا الجوع، كتير هيك، وعفكرة معاليك، من جهتي ملفاتك ما بتعنيني، مش عدم ثقة لا سمح الله، بس محسوبك ما بيتعاطى لحوم… نباتي بعيد عنك…
فطحل أنا… وفطحل معاليك…