بلا سياسة…

موقع إنباء الإخباري ـ
حسن ديب:

يا خيي انتَ ليش ما عم تفهم عربي، ما صرنا الف مرة قايلينلك انو بلا سياسة، ما كل شي بالبلد ماشي وكل الأمور عال العال، بس إنتَ حاسة النق عندك عالية شوي زيادة عن اللزوم، انو ما فيك تقعد بلا سياسة مثلاً، ولا صارت بدمك القصة، ولك يا رجُل شو بدك انو فخامتو يضل قاعدلك عالتويتر تيشوفك شو عم تكتب، ولا إنو معاليه ما عندو شغلة وعملة غيرك لحتى يضل لاحقك من مطرح لمطرح تيشوف أفلطونياتك السياسية ويطوِش راسو بخبرياتك، ولك شو إنتَ ما عارف حالك مع مين عم تحكي ومع مين علقان.
ولو، عنجد القصة بدا ولو، إنو ما بقى تستحي عحالك يعني، يا خيي شو فيها إذا ما عم تلاقي شغل، ما تلات رباع الشعب اللبناني قاعد بلا شغل، هلأ إذا الدولة بدك ياك ترتاح وتقعد ببيتك بتقوم بتاخد عخاطرك، ولك هيدي قعدتك بالبيت هي بند من بنود خطة التنمية الأُسرية شو مفكر إنتَ، بعدين شو بدك بالشغل ما الدولة عم تشتغل فيك شو بدا تلحّق الدولة تتلحّق.
بس بعدني حاسسك ما عم تفهم عربي …
نازل نق، نق، نق، يا خيي وإذا ما عم فيك تشتري ربطة خبز، شو ضروري إنتَ وولادك تاكلوا كل يوم، من شو بيشكي الريجيم، ما شايف حالك كيف صاير، ولك هيدا مش غلا معيشة يا فطحل، هيدا كمان بند من بنود خطة العناية بصحة المواطن تبع الدولة، بس إنتَ نيتك عاطلة.
وإذا يعني مش عم تقدر تدفع أقساط المدرسة لولادك، شو ضروري كل ولاد البلد يتعلموا، ليش إذا تعلموا شو رح يعملوا بالشهادة دخلك، بعدين خليهن بالبيت أحسن ما ينزل إبن شي مسؤول يسكر شي جامعة ويروحوا ولادك بالغلط، شو مفكر إنك رح تقر تحمي ولادك من إبن المسؤول، ولك يا عمي فيق، هيدا بيو أقوى من بيّك.
ونازل كل النهار ما عندك شغلة وعملة إلا النق، ما في كهربا، ما في كهربا، شو بدك بالكهربا، شو إلك عازة بالكهربا، ما طول عمرو جدك عايش عالشمعة هلأ الشمعة بطلت تعجبك، ولا بدك تعمل فيها عمّي السياسي وتحضر أخبار، ما هني برامج الأخبار بطلوا يسترجوا يحكوا سياسي، والجرايد ممنوع تنشر إلا كلمات متقاطعة، ما بقى تعجبك الكلمات المتقاطعة، مش أحسن ما يلعبلك بعقلك شي صحفي ويقلك ما في دولة.
ولك ليش حاطط نقرك بنقر هالدولة، ما بقى تستحي إنتَ، ما بيكفي إنو الجماعة بدن يحموك من المقاومة، إيه، إيه المقاومة، ما إنتَ ما عارف إنو المقاومة هي سبب أزمة 1840، شو بيعرفك إنتَ، ليش وين عايش إنتَ، ما أصلاً إنت مش بلبنان، يا حبيب لبنان ال 10452 كلم2 عملولوا دايت وزم شوي وصار أنجق بيطلع من قريطم لبعبدا مرورا بالمصيطبة، إيه حبيبي صدّق، إنت صرت خارج التغطية الوطنية يا حبوب.
فبلا سياسة، كرمال أخرتك يعني، مش كرمال شي تاني، فإذا شفتلك شي سياسي نصب شي نصبة ضبلي لسانك بحلقك لإنك فهمان الوضع غلط، هيدا النصب بند من بنود خطة الإنماء الزراعي، فهمان كيف.
هيي الأمور عال العال، بس إنت مضيع البوصلة، والدولة سالكة الطريق الصحيح بس إنت رايح عكس السير ومش سالك وضعك.
لهيك لازم تتصالح مع نفسك، شو بيشكي إنك تتصالح مع نفسك، عالقليلة بتتصالح إنتَ وحدا ، هيدا إذا كان بعد في حدا معتبرك حدا أصلاً.
فبلا سياسة أبوس روحك، وخليك بالمسلسلات التركية من شو بتشكي المسلسلات التركية، إنو صحيح إنك عشوي بتحس حالك واحد من العيلة تبع المسلسل بما إنو كل مسلسل بياخدلو سنتين تيخلص، بس إنو منيحة تصير تركي، ما هو بلكي ساعتها بتفهم تركي بما إنك ما عم تفهم عربي، ما تستحي بقصة إنك ما بتفهم عربي ما هني تلات رباع أهل الدولة تاريكن العربي وعم يركوا عغير لغات ، مش عيبة القصة.
بس بالنهاية لازم تبطل حكي السياسة، وترضى بالأمر الواقع، لإنك إذا كملت هيك رح توقع عراسك، وما حدا رح يرحملك راسك، فكرمال هيك خليك ماشي الحيط الحيط وقول يا رب السترة…
وبلا سياسة…