بلا سياسة: هل تعلم؟؟؟…

موقع إنباء الإخباري ـ
حسن ديب:

عزيزي المواطن اللبناني…
بعد التحية والسلام، ما رح إسألك كيف حالك لإنو حالك صاير متل الحالة يلي حالتها حالة، يعني بالمختصر المفيد وضعك مش ولا بد لإنك عايش ببلد بتحكموا ناس مخبايين الطاسة وبيقولولك الطاسة ضايعة، وحضرتك، إيه حضرتك ولا مرة جربت تشغل الطاسة يلي حاملها فوق كتافك لحتى تعرف حالك وين رايح، يمكن لإنك تعودت إنو مش إنت يلي بتقرر وين تروح وأدمنت تمشي مطرح ما جماعة الطاسة الضايعة بياخدوك، ليسَ…
شو بدي ضل كل العمر ناقرك وتناقرني، خلص بيكفي هلأد ما إنتَ زهقت مني إيه بعرف إنك زهقت مني، وكرمال هيك ولإني أنا ما بزهق خلينا نشوفك إذا أنتَ تعلم، فهل تعلم؟؟؟
هل تعلم عزيزي اللبناني، إنو الفتنة يلي بيحذروك منها وإنو خليها نايمة، هيدي أكبر كذبة بالعالم لإنو الفتنة صارت موجودة بحياتك اليومية وبتنباع بالدكاكين مع ربطة الخبز؟
هل تعلم بإنو الوحدة الوطنية والوفاق الوطني ما موجودين إلا بالخطابات العقيمة يلي بيلطخوك ياها السياسيين بالأعياد والمناسبات؟
هل تعلم بإنو الجيش العقائدي صار لا تهزو واقف عشوار؟
هل تعلم بإنو الجندي المنشق لو كان عندو إنفصام بالشخصية ما كانوا سمحولوا يفوت عالجيش أصلاً؟
هل تعلم بإنو داعش موجودة بالبرلمان اللبناني ولكن بربطات عنق؟
هل تعلم بإنو داعش عم تاخد حقوقها بلبنان أكتر منك؟
هل تعلم بإنو داعش موجودة تحت بيتك وتحت كل بيت في تحتو تاجر مخدرات عم يبيع بشكل علني؟
هل تعلم إنو المخدرات صارت ديليفري؟
وهل تعلم إنو إذا بالغلط إجت عينك بعين تاجر مخدرات بيشيلوا عينك وبيلعبوا فيها بالكلة؟
هل تعلم بإنو متعاطي المخدرات بيفوت عالمخفر معو حبة بيطلع معو حبتين؟
هل تعلم بإنو الآدمي ما بقى إلو مطرح بلبنان؟
هل تعلم بإنو إبنك عايش ببؤرة فساد ما عارف فيها غير ربك؟
هل تعلم إنو الجنود المخطوفين ما حدا مسترجي يقول كيف وصل عددهم لهلأد؟
هل تعلم إنو الإيد يلي جابت مليار دولار مساعدة للجيش ما رجعت فاضية؟
هل تعلم بإنو التجارة بالناس هي أسهل أنواع التجارة وأربحها؟
هل تعلم إنو إبنك بيموت عباب المستشفى لإنو ما معك تدفع الفاتورة وإنو الدعاديش بيتعالجوا بمستشفيات لبنان عحسابك؟
هل تعلم بإنو الدولة ما عندا وقت توقف شادي المولوي لإنو ملتهية بنوح زعيتر؟
هل تعلم بإنو الأحزاب شريكة بالفساد يلي ضارب المجتمع؟
هل تعلم بإنو لحتى الدولة توقف شادي المولوي بدا إذن بالتراضي؟
هل تعلم إنو إنتَ واقف بالصف وناطر دورك لحتى تاكل السحسوح؟
هل تعلم بإنو إذا بدي ضل أكتب من هلأ لأخر العمر ما بيخلص الحكي؟؟؟؟
إنو إذا كنت تعلم وساكت فهيدي مصيبة وإذا كنت لا تعلم فهيدي مصيبة أكبر لإنو أكتر من هيك ما بقى في، وبعدك قاعد عم تضرب كف ع كف وتقول الله يسترنا من الأعظم، عأساس إنو في أعظم من هيك…
يا عزيزي، بوعدك إنو نحن وصلنا عالهاوية، وهيدا هو الأعظم يلي كنت تضل خايف منو، وصل لعندك وحضرتك بعدك ناطر بلكي في شي أعظم وما معك خبر…
ليك يا عزيزي، عم إحكيك من مواطن لمواطن ومن خي لخي، هيدا البلد ما بيقوم ولا بيصير بلد إذا ما وعيت من كبوتك ونفضت الناعوسة عنك وحطيت إيدك بإيد يلي حدك وقررتوا تغيروا، صدقني الموضوع ما بدو أكتر من وعي وجرأة وخطوة أولى.
لذلك عزيزي فيق، يستر عرضك فيق وقوم وقول كلمتك وشارك بجدية ببناء الوطن يلي بدك ياه…
عفكرة راجع شو كتبت من الأول بتلاقي إنو ما في شي سياسي، ما هو نحن متفقين إنو علاقتنا تكون بلا سياسة…