بلا سياسة: مش طبيعي …

موقع إنباء الإخباري ـ
حسن ديب:
وقد صرح هولاكو بأنه مرشح طبيعي لرئاسة الجمهورية …
والله ما بعرف شو بدي قلك، خبرتك هيديك اليوم إنو لبنان كبير عليك، وإنو لا رح فيك تكبر عقياسو ولا فيك تزغرو عقياسك، بس ما عم تقنع، هيك لازقة براسك الخبرية إنك مُرشح طبيعي، ومن الطبيعي إني إرجع خبرك بإنك كائن ما طبيعي،لإنك ما عم تستوعب إنو أيام ال 1982 راحت وما بقى ترجع وإنو اليهودي صار أضعف بكتير من إنو يبعتلك دبابة توصلك عقصر بعبدا، بس سبحان الله، خلص، بعدك متنحر إنو فيك تلعب بالبلد متل ما بدك، وبعدك متخايل إنو إيدك طايلة، وع سيرة الإيد الطايلة، دخلك كيف صارت إيدك؟؟؟
مش أنا عم إسأل، هيدي إهدن هي يلي عم تسأل، بس حتى ما تفكر إني شمتان رح قلك الله يشفيك، مش يشفيك من قصة إيدك لا سمح الله لإن الإيد يلي تلوثت بالدم وانعطبت هي وعم تقتل هيدي ما فيها الشفى، عم إدعيلك الله يشفيك من مرضك النفسي يلي صاير عم يطرطش علينا كل يومين تلاتة، إيه إيه حبيبي مرض نفسي هيدا. شو؟ ما سمعتك علي صوتك شوي، بدك تحاسبني قضائياً عحكياتي، ليه حبيبي؟ الدولة بتحاسب عحكي السياسة وأنا زلمة ما بحب السياسة ولا بحب حكي السياسة، أنا عم إحكي بالطب، هلأ صحيح إنك طبني طبتك العافية، بس لا بأس إنو نحكي نحن وياك من فترة لفترة، حتى لو كان الحكي عن بعد، بيضل أحسن من إنو ما نحكي بالمرة، ما هو ما عم تزبط معي إحكيك مباشرةً لإني ما شايفك، ما تفهمني صح الله يخليك، ما قصدي إني ما شايلك من أرضك، قصدي إنو بعد المسافة بيناتنا عم تخليني ما شوفك.يا زلمة ما توقف عند هالكلمة هلأ، إنو مرقنالك كتير قصص مرقلنا هيدي، بس للصراحة، أنا متمني شوفك، مش كرمال طلتك البهية، وع سيرة بهية أحلا تحية للست بهية وبعدين بنبقى بنحكيها وبنعزيها بقتلى قلعة الحصن،ليس…
خلينا بموضوعنا، للصراحة متمني شوفك لإن في كم سؤال ما عم لاقيلهن جواب، يا زلمة بفهم إنو ارتكبتوا مجزرة بحق الشهيد طوني فرنجية وعيلتوا بحجة توحيد البندقية، بنمرقها، وبنفهم إنك قتلت الرئيس الشهيد رشيد كرامي، لحتى تمرق مشروعك اليهودي، كمان هيدي بنمرقها،وبنفهم كمان وكمان إنو قصة صبرا وشاتيلا وغيرها من المجازر ارتكبتها تحت شعار تجريد لبنان من هويتو المقاوِمة، كل هيدا يا رجل رح نمرقو، وإنو نمرقو مش يعني سامحناك لا حبيبي غلطان كتير إنتَ، لإنو الشعب ما خصو باللعبة السياسية يلي أفرجت عنك، ما قلتلك نحن ما عم نحكي سياسة، بس كمان خلينا بموضوعنا، أنا حابب شوفك تأعرف منك، إنو إختي يلي قتلتها عباب البناية هيدي شو ذنبها، وبنت الجيران يلي قتلتها هي وعم تنشر الغسيل، وإبن الجيران يلي كان راجع من المدرسة، ورفيقي يلي راحت عينو بملعب الفوتبول هو وواقف حدي، عفكرة فرقت بيني وبينو ع متر… دخلك هيدول شو الذنب يلي ارتكبوه لحتى حضرتك تصفيهن، وبأيا خانة من خاناتك السياسية فينا نصنفن، وبعد بتقلي إنك مرشح طبيعي للرئاسة، لا يا هولاكو لا، غلطان كتير، إنتَ مرشح طبيعي للإعدام مش للرئاسة.
بعدين، مش رح تبطل حكي المهرجين تبعك، إنو هلأ صار شعارك الإنتخابي سحب حزب الله من سوريا إذا صرت رئيس، يخزي العين عنك شو إنك فهيم، ما هو عأساس إنو إذا صرت رئيس رح تقول يلا شباب ارجعوا من سوريا، وعالحارك رح يضبوا غراضن ويقولولك تكرم عينك راجعين، ليك بشرفك ( حلفتك بشرفك تتقدر تكذب) إنو بشرفك إنت مصدق حالك، ولك يا حبيبي حزب الله لما راح ع سوريا أخد رأيك شي؟ ولي الحزب أخد رأي الناس يلي رأين أهم منك ومن كل تاريخك، ولي هودي الناس هني لبنان مش إنتَ، هودي الناس هني التاريخ وهني الجغرافيا وهني الحقيقة مش إنتَ.
إنتَ مش أكتر من وهم عايشو لحالك إنتَ وهالكم عدد يلي حواليك. وما تفكروا إنكن بتمثلوا لبنان، ولي أكتر شي فيكن تمثلوا مسرحية سودا بتاريخ الوطن إنتو.
قال شو بدو يسحب حزب الله من سوريا، ولي إذا إنتَ بتصير رئيس كلنا بدنا نترك لبنان ونروح ع سوريا، وكلنا بدنا نسحب جنسياتنا اللبنانية ونلزقها بخلقتك، لا تقوم مفكر إنو الدني سايبة وإنو بعد نقبل طق السوالف تبعكن، لا حبيبي نحن بوقت ما كان اليهودي بكل ثقلوا واقف بضهركن ما قبلنا إيه بدك يانا هلأ نقبل، غلطان كتير كتير، وغلطان أكتر إذا بعدك مفكر إنو بالسياسة فيك تعمل المستحيل، لإن ببساطة نحن يلي صنعنا التاريخ ونحن يلي رسمنا طريق لبنان، وبصراحة أكتر، ما تزعل من صراحتي لإن الصراحة حلوة أد ما كانت بتجرح…خاصة إذا كانت بلا سياسة…
فخلينا بلا سياسة .