بلا سياسة: شكلك مش غريب…

موقع إنباء الإخباري ـ
حسن ديب:
شكلك مش غريب، برنامج بينعرض على شي محطة فضائية، ما بعرف وين لإني ما بتابع تلفزيون.
هلأ هيدا شي ما كتير مهم إذا بتابع تلفزيون أو لأ لإن رح يطلع حدا يقلي ما حدا سألك.
حاصلو إنو هيدا البرنامج بيعتمد على تقليد شخصيات فنية معروفة، وكمان هيدا شي مش مهم، المهم إنو عنا بالسياسة اللبنانية في برنامج حقيقي إسمو شكلك مش غريب، وهون الشي المهم، إيه مهم، لإنو مع كل طقم سياسي بيهبط علينا مدري من أيا كوكب، بتحس إنو السياسي عم يقلد شخصية الإنسان الوطني، وبيني وبينكن في سياسيين شاطرين لدرجة إنو بيجيبوا الدور بشكل إحترافي، إنو الواحد فيهن بيقنعنا بوطنيتو، العمى شو شاطرين، عن جد شاطرين، يعني بيخلوك تعيش الحالة معن وع شوي رح تزقفلن بس لو ما إنو حالة الزهق بلشت تحك دماغنا شوي، وإلا كنا رحنا معن بالدور للأخر، هلأ هو التمثيل حلو، سألوني إلي لإني جربت القصة، بس يلي مش حلو إنك تقضي كل حياتك عم تمثل، وهيك صاير فينا مع جماعة السياسة بلبنان إنن آخدين القصة كلها تمثيل بتمثيل، والمصيبة إنو الواحد منن بيخلق ممثل محترف بالفطرة، يعني ما بدو تدريب خلص جاهز لدور البطولة، وبيبقى هالوطن المعتر متل خشبة المسرح ناس رايحة وناس جايي وهو بيبقى ملعب لإظهار المواهب السياسية…
شكلك مش غريب، قصة بتنتطبق عالسواد الأعظم من الطقم الحاكم،حتى ما نظلم الكل، لإنو بيضل في كم واحد مش موافقين عالدور يلي عطاهن ياه المخرج وهودي قلال، ولكن بالإجمال هيك صاير حالنا.
يا خيي والله صار النقد السياسي صعب، إيه صعب لإنو الحكي بطل يفيد، وع سيرة الصعب مثلاً … إنو الوزير أبو صعب شو كان ناقصو لما استلم الوزارة بإنو يشوف قصة السلسلة ومشكلة الأساتذة، ولو يا معاليك، إنو مش كانت هالقصة أهم من كتاب التاريخ يلي جيت تغيرو وكأنو إذا غيرنا الكتاب رح نقدر نغير التاريخ، يا حبيبي عالورق فينا نغير كل شي بس التاريخ بعمرو ما بيتغير، بس إنو ليش لحتى كل مرة ننطر لنوصل عالإمتحانات الرسمية ونعفك المشكل مع الأساتذة، إنو شو بيصير إذا عفك المشكل أول العام الدراسي، ما هو واقع وواقع بس ليش لحتى تحترق روح التلميذ يعني، ولو يا رجل، ما بيكفي إنو قررتوا الإمتحانات بوقت المونديال، يعني شو بيعمل التلميذ، إنو بتحطوا التلميذ ببيت اليك إمتحان تاريخ ومباراة البرازيل وكرواتيا، طيب بشرفك إنو ناقصو التلميذ ضياع لحتى تجوا تضيعوا أكتر، طيب فهمنا إنو العلم أهم من الفوتبول طيب ما اختلفنا، بس إنو ليش هالمعتر بدو يضل لأخر لحظة محتار على خبرية في إمتحان طفوا التلفزيون، طار الإمتحان دوروا التلفزيون، يا خيي ما بدكن ترحموا التلميذ ارحموا التلفزيون، ما بيصير هيك.
وللصراحة مش بس الحق عالوزير، ما هو الوزير وزير يعني عم يمشي متل ما غيرو مشي، بس الغريب موجود كمان بِ حنا غريب، وخينا حنا يعني ما بعرف بحس إنو من تحت الطاولة ( وهيدي رح تجبلي وجع راس) بس هيك بحس إنو من تحت الطاولة عم يلعبها هو والوزارة، يعني كل سنة نفس الموال إضراب وبطلنا نعلم وما بدنا نفتح المدارس، طيب ليش ما بتعملوها أول العام الدراسي وعن جد بتأضربوا، إنو ليش عطول وقت الإمتحانات، وأكيد متل كل سنة بكرا بتلاقوا حل وبتعملوا هدنة وبتتصالحوا عضهر التلميذ، والتلميذ بياكل الضرب وبيروح عليه المونديال وبيروح عليه الإمتحان، لإنو “بين في وما في” بينسى يلي كان دارسن المعتر، هيدا كلو وارد صحيح إنو مش أكيد بس وارد، لإنو الأكيد إنو لا الوزير ولا حنا غريب عندن ولاد مقدمين عالإمتحانات الرسمية، ما هو النار ما بتحرق إلا مطرحها، لهيك الجماعة مش فارق معن الوضع وكل واحد عم يلعبها عطريقتو.
ومن جهتي ما فيي إلعبها عطريقتي، يعني صحيح إنو ابني ما عندو تقديم رسمي وصحيح إنو فيي فَوكس عالمونديال وما إشغل بالي بالموضوع، بس ما بتزبط لإنو يوماً ما هالإبني رح يكون عندو إمتحان رسمي وأكيد إذا سكتنا اليوم رح نوصل وقتها لنفس المشكلة، وهيدا الفرق بين السياسي والمواطن، السياسي ما بيفكر إلا بحالو بينما المواطن مجبور يفكر بغيرو لإن السحسوح يلي عرقبة غيرك إذا سكتت عنو بكرا بيوصل لرقبتك…
إيه والله شكلك مش غريب، شكلك واحد منن متلك متلن وما حدا أحسن من حدا، ونحن شكلنا مش غريب كمان لإنو بنشبه بعضنا، إنتو متل بعضكن شايفين الوطن ثروة وعم تتقاسموها، ونحن متل بعضنا شايفين الوطن ثروة وبدنا نحافظ عليها، إنتو متل بعضكن عم تفكروا تورثوا الحصص والمراكز لولادكن، ونحن متل بعضنا عم نفكر نحافظ على شوية كرامة نورثها لولادنا.
شكلك مش غريب، ما هو ما في شي غريب عليكن، ما نحن تعودنا عليكن، بس المشكلة إنو إنتو ما تعودتوا علينا، فلا إنتو شكلكن غريب ولا نحن من ضمن حساباتكن، ووحدو الوطن هو يلي عايش غريب بيناتكن، إيه غريب، وحدو الوطن هو يلي عم يبكي ويا ريت فيكن حدا فكر شي مرة يمسح دمعة الوطن، والله إنو الوطن شبع قهر وبكي ودموع بس إنتوا بعدكن ما شبعتوا، ومش من المتوقع تشبعوا بالقريب العاجل.
وع سيرة العاجل، رح يجي يوم وتقروا بالخبر العاجل إنو بركان الحق بالوطن انفجر ووقتها رح يكون شكل الوطن مش غريب، رح يكون شكلو طبيعي ووقتها رح تلاقوا حالكن خارج المعادلة السياسية، صحيح إنو القصة بدا وقت بس مش مشكل مع الوقت كل شي بيصير…
وما بيصير إلا يلي كاتبو ربك، وربك إلا ما يفرجها، والفرج إلا ما يحمل الحياة، والحياة إلا ما تكون حلوة، والحلا إلا ما يكون… بلا سياسة…