بلا سياسة: خدنا بحلمك…

موقع إنباء الإخباري ـ
حسن ديب:

فجأة هيك قمبز من النوم صاحب الغبطة وتذكر إنو في عندو رعايا بفلسطين المحتلة ولازم يروح يشوف شو أوضاعن، سبحان الله، وكأنو كان نايم وهبط عليه الوحي، إيه هو ذاتو الوحي يلي نزل على بيو لسيئ الذكر، حاصلو، وكأنو هبط عليه الوحي وقلو ولو يا بشارة ولو شو باك ناسي رعاياك بفلسطين المحتلة، قوم فز من نومك وهووووووب بوجك عفلسطين شوف الناس شو بدا…
إنو معليش يعني، خدنا بحلمك شوي يا صاحب الغبطة، وما تنغبط علينا كتير لإنو مش ناقصنا حدا يستغبطنا، يلي فينا مكفينا، يا خيي بدك تقول إنو عندك رعايا بفلسطين المحتلة ما اختلفنا ما نحن طول عمرنا بنقول وبصوت عالي إنو نحن شعب واحد وتاريخ واحد، بس يمكن حضرتك نسيان الماضي، وإن كنت ناسي اللي جرا جيب الدفاتر تنقرا، غبطك ليش كل هالسنين كنت ناسي فلسطين وأهلها، وليش ولا مرة جبت سيرتها بنص حرف، ولا يمكن ما كان معك خبر إنو هيدي الأرض المحتلة هيي أرض المسيح (ع)، وإنو اليهود دنسوها من زمان كتير، ويمكن كمان حضرتك نسيان إنو يلي استشهدوا بتل الزعتر والنبعة ويوم السبت الأسود وبصبرا وشاتيلا هودي كمان كان فيهن رعايا لحضرتك، بس يمكن بالنسبة لغبطتك في مقياس رعوي بيختلف بين القاتل والقتيل.
بعدين يا طيب،شو صاير عليك حتى تفوت هالفوتة، يعني مبسوط إنو يوقفك حاجز يهودي يختملك وراقك لتفوت تزور القدس، يعني غبطتك بتلاقي حالك مرتاح بإنك ما فيك تفوت عالأرض المقدسة إلا بختم ناس هني ذاتن يلي ظلموا المسيح (ع)،يا حبيبي لا تقوم مفكر إنو مشكلتنا معن بس مشكلة أرض واحتلوها، لأ يا غالي لأ غلطان كتير إنت، هودي الكائنات مشكلتنا معن أكبر من هيك، مشكلتنا معن مشكلة وجود بحد ذاتو، ومشكلتنا معن قديمة كتير عمرها تخطى الألفين سنة، مشكلتنا معن أيام المقاوم السوري الأول يلي هو المسيح (ع) بس يمكن إنت مقتنع إنو المسيح يهودي متل ما بيخبركن هونيك بالصرح البابوي، نحن ما بيهمنا شو خبروكن حبيبي، لا نحن بيهمنا شو خبرنا تاريخنا. صراحة أنا كنت مفكرك أذكى من هيك، بس ما عم أعرف شو صاير معك وشو هالسر يلي ناتعو بقلبك ومتحمس لهالروحة، يا خيي لا تقوم مشتاق للجماعة يلي راحوا مع اليهودي بال 2000 إذا هيدي القصة بسيطة يا زلمة ما بدا هالأد تفضل روح الله والنبي معك، ما حدا ماسكك، روح وضلك معن، ما كرمال شي يعني، بس ضلك معن بلكي فيك تقنع هيدا يلي تخلى عن المسيحية واعتنق اليهودية إنو يرجع لأصلو، بلكي بيقنع معك، ما خسران شي جرب يا خيي.
ما هو لبنان كلو قايم عمبدأ التجربة، ويلي بيجرب المجرب بيكون عقلو مخرب، بس جرب ما رح تخسر شي، ما نحن بهالوطن ما خلينا شي ما جربناه، وما في شي إجا من الغرب بيسر القلب، والحمدلله ما في حدا بلبنان سياسي أو رجل دين إلا ما ضاربة معو سن شمال عالغرب.
روح خيي روح، ما حدا ماسكك، بس لما تروح ما تزعل منا لإنو بوعدك ما نترك عليك ستر مغطى، إيه بوعدك حبيبي، وما تقول ما خبرتك، من هلأ عم خبرك، إنو سيرتك رح تصير على كل لسان، بتعرف ليش؟
لإنو هيدي فلسطين، ويمكن إنت ما كتير بتعرف شو يعني فلسطين يلي رايح عليها وانت عارف مسبقاً إنو بدك إذن يهودي لحتى تفوت عليها، فلسطين يلي حضرتك شايفها مركز الحج للمسيحية، نحن شايفينها أكبر من هيك بكتير، نحن شايفينها بتسوى الدني كلها وشايفينها مهد الديانات السماوية ومهد الحضارات، وما تفكر إنو نحن مش رح نروح عفلسطين، لا حبيبي غلطان إنت، نحن كمان رايحين عفلسطين، بس رايحين عطريقتنا نحن مش عطريقتك إنت، ورايحين عفلسطين الحرة مش فلسطين المحتلة، نحن بدنا نحرر فلسطين ما بدنا نكرس الإحتلال، وهيدا هو الفرق بيناتنا حبيبي.
بدك تروح روح، وبدك تضل هونيك ضل، وبدك ترجع كمان ما رح نمنعك، بس صدقني لما نحن نروح كلكن إنتو يلي نسيانين فلسطين ما رح يكون إلكن مطرح بيناتنا، عم تسمعني منيح، ما رح يكون إلكن مطرح، بتعرف ليش؟ لإنو فلطسين ندهت أهلها، ونحن أهلها،هيك كنا وهيك رح نبقى.
نحن أهلها، أهل الحق والخير والجمال، وعلى أد ما غبطتك بتعنيلك فلسطين بالسياسة، نحن فلسطين هيي عشقنا وهيي قضيتنا، وهيي يلي بتعنينا… بلا سياسة .